गोरक्ष समाचारदाता
तुलसीपुर, १६ भदौ । मानव अधिकार तथा शान्ति समाज जिल्ला कार्यसमिति दाङ शाखाको २८औँ साधारणसभा तुलसीपुरमा सम्पन्न भएको छ । साधारणसभामा लुम्बिनी प्रदेशका पूर्व मुख्यमन्त्री डिल्लीबहादुर चौधरीले सत्ता चुक्दा खबरदारी गर्ने निकाय फितलो बने लोकतन्त्र कमजोर बन्न सक्ने खतरा रहने बताए ।
नेपाली कांग्रेस लुम्बिनी प्रदेश संसदीय दलका नेता चौधरीले सत्ता चुक्दा खबरदारी गर्ने नागरिक समाज पछिल्लो समय फितलो बन्दै जान थालेको प्रतित हुन थालेको प्रति चिन्ता जाहेर गरेका थिए । मानव अधिकार तथा शान्ति समाज जस्ता संस्थाका कारणले नेपालमा प्रजातन्त्र सुद्रिढ हुन पाएको भन्दै उनले नागरिक समाज फितलो बन्दा प्रजातन्त्र पनि कमजोर हुने आशय व्यक्त गरेका थिए ।
‘जसले शान्ति यात्राको मार्ग प्रशस्त गर्छ र जस्ले भ्रष्टाचार न्यूनीकरणमा सघाउँदै आएका छन्, त्यस्ता निकाय कमजोर हुँदा लोकतन्त्र पनि कमजोर बन्ने खतरा रहन्छ’, उनले भने । कार्यक्रमलाई सम्बोधन गर्दै मानव अधिकार तथा शान्ति समाज दाङ शाखाका पूर्व अध्यक्ष तथा अधिवक्ता मोहन धितालले राज्य र विद्रोही पक्षले नेपालमा दश वर्षे द्वन्द्वका समयमा आतातायी रूप प्रर्दशन गर्दाको समयमा आम मान्छेका लागि बाँच्न पाउने अधिकारको वकालत गर्दै कानुनी राज्यको प्रत्याभूति दिलाउनका लागि समाजको स्थापना गरिएको बताएका थिए ।
कार्यक्रमलाई समाजका केन्द्रीय सचिव तुलसीराम सुनार, समाजका कर्णाली प्रदेश सचिव डिल्ली जैसी, सल्यान शाखा सभापति अम्वेश्वर डाँगी, दाङ शाखाका संस्थापक सभापति तथा अधिवक्ता डिल्लीराज धिताल, उच्च अदालत तुलसीपुरका नेपाल बार एशोसियनका अध्यक्ष मधुसुदन गौतमलगायतले बोलेका थिए ।
समाजका उपसभापति अमृत शर्माको स्वागत मन्तव्यबाट सुरु भएको कार्यक्रममा तुलसीपुर उद्योग वाणिज्य संघका महासचिव केशवराज केसी, तुलसीपुर चेम्बर अफ कमर्शका उपाध्यक्ष सन्तोष खड्का, नेपाल उद्योग व्यापार संघ तुलसीपुरका अध्यक्ष कृष्णबहादुर पुन, राष्ट्रिय अपाङ्ग महासंघ लुम्बिनी प्रदेश अध्यक्ष देवा डाँगी, ज्येष्ठ नागरिक सरोकार मञ्चका अध्यक्ष खुमानन्द अधिकारी, समाज कल्यान केन्द्रकी सचिव जानुका केसी, महिला अधिकार सक्षक संजाल दाङकी उपाध्यक्ष पद्मा चौधरीलगायतले बोलेका थिए ।
मानव अधिकार तथा शान्ति समाज दाङ शाखाका सभापति कोमल डाँगीको अध्यक्षतामा भएको कार्यक्रमको सहजीकरण शाखा सचिव माधव बस्नेतले गरेका थिए ।