हेमराज शर्मा
दाङ, १५ बैशाख। लकडाउनको मौका छोपी वन क्षेत्रमा बाटो खनिरहेको आरोपमा डिभिजन वन कार्यालय दाङको टोलीले चालकसहित एउटा स्क्याभेटर नियन्त्रणमा लिएको छ ।
घोराही उपमहानगरपालिका वडा नं। १९ स्थित च्यानगैरादेखी श्रीचौर जाने गोरेटोबाटोमा विना अनुमति स्क्याभेटर प्रयोग गरी बाटो खनिराखेको अवस्थामा शुक्रवार राती साढे १ बजे डिभिजन वन कार्यालय दाङबाट खटिएको गस्ती टालीले चालकलाई पक्राउ गरी बाटो खन्न प्रयोग गरिरहेको स्क्याभेटर नियन्त्रणमा लिएको हो ।
च्यानगैरादेखी श्रीचौर जाने बाटो खन्ने शिलसिलामा दुवीचौर राष्ट्रिय वन खण्डमा बाटो खनिरहेको अवस्थामा रा १ क ७५९ नम्बरको स्क्याभेटर प्रयोग गरिएको डिभिजन बन कार्यालय दाङले जनाएको छ । ४ देखी ८ मिटरसम्मको चौडा अन्दाजी ८ सय मिटर बाटो खनिसकेको अवस्थामा वंगलाचुली गाँउपालिका(२ निवासी २५ बर्षीय थमबहादुर घर्ति मगरलाई पक्राउ गरेको छ ।
चालकलाई दाङ देउखुरी जिल्ला अदालतबाट भिडियो कन्फिरेन्सिङ्ग मार्फत १५ दिनको म्याद थप घटनाको अनुसन्धान भैरहेको कार्यालयले जनाएको छ । घटनाको विस्तृत अनुसन्धान भईरहेको अनुसन्धानबाट दोषी पत्ता लगाई घटनामा संलग्नहरुलाई प्रचलित कानूनी बमोजिम कार्वाही गरिने डिभिजन वन कार्यालयका प्रमुख दिपक ज्ञवालीले जानकारी दिएका छ्न ।