इन्द्र चौधरी
थारू स्वास जाट ना ठग जन्ना नाट लभार । उँह मार थारून्क जाट पाछ परल व पराई जाट हुइटी । स्वास फाईदा और जाटक मन्नै उठाईल बाट । मर मर काम कर्लसे फे प्याट भर खाई नै पैना आढ प्पाट खाख हुईलसे फे आपन पर्यार पल्ना कर जैठा ।
राजनीटि कना का हो ? ढ्यार थारू मनैन पटा नै हो । सक्कुन स्यावा कर्ना जाट हुईलक ओर्से हो कि का हो, अै स बेर काम कर्ना फुर्सटअस हुईलसे हर्चाली कर्ख बैठ्ना कर्ठी । पर्बाटी ट बैठ्ल बैठ्ल मिट मिट खैना सुग्घर सुग्घर लुगाफाटा लगैना करट डेख्जैठा । ठन्र्हक जाटम कुछु और लौव काम करु कलसे हिम्मट व आँट कर नै सेक्ना हुईलक से कौनो बरा बरा काम कर नै सैकजाईट ।
डुई चारठो ठारु बाहेक ढ्यार ठारु अस्ट सहल बाटी । हामा जाटम आपन नाट कविलन रुप्या पैसा म अप्ठ्यार पर्लसे हेरिक ह्यारा कर्ना चलन नै हो । याकर संस्कार बन नै सेक्ल हो । यी ठुन्यार काम नै हो । पर्वाटी आपन ईष्टमित्रन परल व्याला जहाँसे फे खोज खाज कैख फे मद्दट कर्ठ । हामा जाटम रुप्या पैसा रटी रटी फे नै हो कैख छपैठ ।
ठारु मनै हर काम कर्ठी । इ काम नै कर्टी कना कुछु नै हुई कना अस लग्ठा । ज्या काम फे कर्ना, ज्या काम फे जन्ना । वास्टवम ठारुन्क पुर्खा ट वैज्ञानिक हुईट । याक ढ्यार प्रमाण डिह सेक्जैठा । जस्टख हर साल धुरौरी पुजम गन्यारीम से आगी उठैना, उट्टर दखिनख घर बनैना, पुरुव पच्छिउँ झ्याल ढर्ना अस्ट अस्ट । जस्ट कि डाङम पर्गन्ना बाँटल बा उह अस्जार राजनीटक क्षेत्र विभाजन कर्ल बाट राजनीट करुईयन ।
ढ्यार्नक काम ठारु पैल्हसे अँख्वा ले स्याकल हो । प्रजाटान्त्रिक संस्कार अन्सार महटावा चुन्ना कर्टी आईल हो । तव सक्कु नियम कानून मुखाग्र रह । अह्राई सक्कुजन मन्ना चलन रह । गाउँम हाँक पर्लसे केल फे कचेह्रीम जुट्ना चलन रह । आसकाल घर घर खब्र्याए जाईबेर फे कचेह्रीम नै अईना कर्ट । खारा लेना कलसेकेल अइना कर्ठ । जम्म कामक पाछ केल डर्गुना कर्ठ । कत्रा शोषण हुईटा कना नै जन्ना ।
नीटि नियम का बन्टा, ठन्र्हक बारेमा का का हुईटी बा कना कुछु । चासो नै ढर्ना हुईल ओर्से डुख भ्वाग परल बा । डिन छ सय ज्याला खैना वडाम सिफारिस लि गैलसे डु डिनक कमाईले नि पुग्ना, डोस काजे असिक करल कैख अप्न्हे अप्न्हे गनगनैना कर्ना सह परल का कर्ना योजना बनाईबेर, बैठक भ्यालाम नै जैना डोस पटा नै पैना हुईठा । मुर्घीन्या फटफटाए आपन कपारीम कह अस अमल हुईल बा ।
सक्कु राजनीटिक पाटीसे जनसंख्यक आधारम ठारुन टिकट डिह पर्ना बा । वडा स्टरक टिकट डिकलाक टोल टोल मसे सिफारिस कर पर्ना व्यवस्ठा हुईलक ओर्से ठारुन सिफारिस कर नै छुटाई हुईल । कभुकाल छुटाई सेक्ठ उहीम सक्कु ठारु मनै ख्याल कर परी नैट पाछ पस्टैबी । बाम भगाख पुस्टा सर्वोना कह अस ना ह्वाए । हामा ड्यासम संघीय, प्रदेश व स्थानीय कैख टीन टह के सरकार बनल बा ।
आसकाल सबसे बल्या टरक सरकार बा । इहीम ढ्यार ठारु मनै जनप्रटीनिधि हुई पैल्हसे ठारु जाटिन्क हिटम कानून बनाई पाजाई । ठारुन्क अस्टित्व से रलक ओ भूह्याँरक महटावा प्रठाह फे कानूनी मान्यटा डि सेक्जीठा । कौनो कौनो ठाउँम महटावा प्रठाह कानूनी मान्यटा डेना काम अख्वा ले स्याकल बाट । संविधानम डिहल मौलिक हक अन्सार भाषा संस्कृटिक संरक्षण अन्सार ठारु भाषा म सरकारी काम काजके भाषा बनाई सेक्जैठा ।
घोराही उपमहानगरपालिका म सरकारी काम काज करबेर ठारु भाषाह फे मान्यटा डेल बा । ट ओही व्यवस्ठिट कर नै सेक्जील हो । ठारु भाषा बोल्ना सजालो लग्ठा लिख्ना कर्रा हुईलक मार एही ह चलन चल्टीम आन नै सेक्जाईठो । सक्कु ओँर लिख्टी गैलसे बान पर्टी जाई व व्याभारम आन सेक्जाई । अस्टख टीन्यो टह म समाबेशी रुपम ठारु जाटीक मनै वडा अध्यक्ष, मेर, उप मेर , गापा अध्यक्ष, सांसड, मन्त्री, प्रधानमन्त्री बन सैक्लसे सक्कु जाटीन्क हिटम काम हुईने रह । काजे कलसे सक्कु काम जानल कलक ठारु हुईलक ओर्से ।
उ ठाउँम जाई नै पैलक ओर्सेकेल कुछु हुई नि स्याकठो । एक डुज केल मन्त्री बन्ख, सांसद बन्ख, मेर बन्ख नै हुई, डान्छे मनैन्क बाट कुई फे नै ओनाईट । आप इह अईना २०७९ बैशाख ३० गटेक डिन हुईना स्ठानीय टह क चुनावम ढ्यार ठारु मनै उमेडवार बनी कर्ना अर्जी करटु । सक्कु ज आघ बर्ही व बह्राई ।