पत्रकार हत्यामा संलग्नलाई कारबाहीको माग
गोरक्ष समाचारदाता
दाङ, १७ चैत । काठमाडौंको तिनकुनेमा भएको पत्रकार सुरेश रजकको हत्याको घट्नामा संलग्नलाई कडा कारवार्हीको माग गरेका छन् । नेपाल पत्रकार महासंघ दाङ शाखाले शनिवार घोराहीमा आयोजना गरेको विरोध कार्यक्रमका सहभागीले पत्रकार रजकको मृत्यु नभएर सुनियोजित रूपमा जलाएर हत्या गरिएको भन्दै घट्नामा संलग्नको पहिचान गरेर कडा कारबाहीको माग गरेका हुन् ।
कार्यक्रममा बोल्दै नेपाल पत्रकार महासंघकी केन्द्रीय सदस्य लीला शाहले घट्नाको सत्यतथ्य छानविन गरेर दोषीलाई कारबाही गर्न माग गरिन् । कार्य क्षेत्रमा समाचारका लागि भिडियो खिचिरहेका पत्रकारको हत्या र सञ्चारगृहमाथि भएको आक्रमण प्रेस तथा अभिव्यक्ति स्वतन्त्रताविरुद्ध भएको भन्दै आगामी दिनमा यस्ता गतिविधि बन्द गर्न सम्बन्धित पक्षलाई आग्रह गरिन् । उनले स्वतनत्रतापूर्वक लेख्न र बाँच्न पाउने अधिकारको सुनिश्चित गर्न सरकारसँग माग गरेकी थिइन् ।
कार्यक्रममा नेपाल पत्रकार महासंघका लुम्बिनी प्रदेशका महासचिव पाण्डव शर्माले आन्दोलनका नाममा पत्रकार तथा सञ्चार गृहमाथिको आक्रमण कुनै पनि बाहना सह्य नहुने बताए । जनताको पक्षमा कमल चलाउँदा भौतिक आक्रमणसँगै ज्यानै लिने गरिएको घट्नाका संलग्नलाई कडाभन्दा कडा कारबाहीको माग गरे । महासचिव शर्माले जनताका अधिकारलाई कुण्ठित गर्ने गरी भइरहेको चलखेललाई सबै मिलेर निस्तेज गर्न लाग्नु पर्ने बताए ।
नेपाल पत्रकार महासंघ दाङ शाखाका पूर्व अध्यक्ष प्रताप रेग्मीले पत्रकारले आफ्नो कर्म गर्दा असुरक्षित हुनु पर्ने र ज्यान नै जोखिममा राख्नु पर्ने अवस्था सिर्जना हुनु दुःखद भएको बताए । पत्रकारिता लोकतन्त्रको आधारभूत खम्बा भएको हुँदा पत्रकारहरूमाथि कुनै पनि हिंसात्मक गतिविधि सह्य नहुने भन्दै पूर्व अध्यक्ष रेग्मीले अराजक गतिविधि गर्ने जोकोहीलाई हदैसम्मको कानुनी कारबाही गर्नु पर्ने माग गरे ।
नेपाल पत्रकार महासंघ दाङ शाखाका अध्यक्ष सन्तोष सुवेदीले कुनै पनि बहानामा सञ्चार माध्यम र पत्रकारमाथि आक्रमण गर्न नहुने भन्दै घट्नामा संलग्नलाई हदैसम्मको कारबाही र पीडितलाई क्षतिपूर्ति दिन माग गरेका छन् । कार्यक्रममा पत्रकार दोषीलाई कारबाहीको माग, प्रेम तथा अभिव्यक्ति स्वतन्त्रताको सुनिश्चित गर्नुपर्ने लगायतका मागसहित विरोध प्रदर्शन गरेका थिए ।
कार्यक्रमको सहजीकरण सचिव जेएन सागरले गरेका थिए ।शुक्रवार पूर्व राजावादीको प्रदर्शनका क्रममा समाचारका लागि भिडियो खिचिरहेको घरमा राजवादीले आगजनी गर्दा एभिन्युज टेलिभिजनमा कार्यरत पत्रकार रजकको मृत्यु भएको थियो ।
