Goraksha

National Daily

भ्रातृत्वके टिह्वार ‘अट्वारी’

अन्जना चौधरी
आज पश्चिम नेपालक थारु समुदाय अट्वारी टिहवार मनैटी बाट । आज दाङसहित बाँके, बर्दिया, बैलाली, कञ्चनपुर ओ सुर्खेतम बसोबास कर्ना थारु समुदाय धुमधामकेसंग अट्वारी टिहवार मनैटी बाट । थारु समुदायके बसोबार ढ्यार हुइल जिल्लाम अट्वारक डिन अट्वारी पर्व धुमधामके संग मनैठ ।
अट्वारी पर्व थारु समुदायक डाडुभैयाँ व डिडिबहिन्या बीचके मैयाप्रेम, भातृत्वके संग सद्भावके पर्वके रुपम फे लेना कैजाइट । भाद्र शुक्ल पक्षक पहिल अट्वारक डिन अर्थात अष्टिम्कीक पाछ ड्वासर अट्वारक डिन अट्वारी पर्व मनैना चलन बा । अट्वारी पर्व थारु समुदाय डस्या पाछक बरा टिह्वारके रुपम मनैठ । अट्वारी पर्वह ढ्यार महत्वक संग थारु समुदाय मनैना कर्ठ । अट्वारी पर्वम थारु समुदायक थार मनै व्रत बैस्ठ ।
थारु समुदायके थारु मनै गैलकरात भिन्सर्या खाक आज अट्वारीक निराहार व्रत बैठल बाट । खासकैख भिन्सर्या खाइकल लाग थारु समुदायक मनै शनिच्चरके डिन दिनभर गेक्टा, घोङघी, मच्छी मर्ना कर्ठ । अट्वारक भिन्सार भाल्या निबस्ल उठ्ख खाएपर्ना चलन बा । भाल्या बासल म भिन्सर्या खैलसे डुठा मान्जिठा । व्रतालु थारु मनै अट्वारक डिन लाहाख मुल घरकके बहरीम ग्वाबरले निप्ठ ।
डोस गाउँक व्रर्ट बैठल थारु मनै एक्क ठाउँ जुट्ख गन्यारीमसे आगी बर्ठ । उह आगी गाउँक सक्कु ज आआपन घरम लैजाख ग्वाबरले निपल च्वाखा बहरीम लौव चुल्हम बर्ठ । यी आगी मुहले फुक नि मिलट । आगी मुहले फुक्लसे डेठा हुइठा कना मान्यता बा । आगी आन्ख सेक्लसे भुख्ल रहल थारु मनै चाउरके पिठा सान्ख गुल्यार गुल्यार ठोप्वा रोटी पकैठ ।
गुल्यार रोटीह सूर्यके प्रतिकात्मक परिकारके रुपम फे लेजाइट । सकुनसे पहिल पकाईल रोटी एककर केल पकाख छुट्ट धरजाइट । असिख एककर पकाइल रोटी भीमह पूज्ना किम्बदन्ती बा ।
अट्वारी पर्वसे ऐतिहासिक घटना जाड्गिल बा । पाँच पाण्डव व द्रोपती सक्कु ज सुर्खेतक काँक्रेविहार घम गइल ब्याला दाङक थारु रज्वा दंगीशरणके राज्यम शत्रु आक्रमण करल खवर सुन्तिकी तावम पकाए धरल रोटी छोरख भीम ९भ्यावाँ० दंगीशरणके पक्षम लडाइँ कर दाङ आख शत्रुहुकन पराजित कर्लक किवदन्ती बा ।
भिम शत्रुहुकन पराजित कैख घर जाइबेरसम फे तावम धरल रोटी जसकाटस रह । रोटी निजरल डेख्क सक्कु ज छक्क पर्टी सत्यके जिट हुइल कटी अट्वारीके डिन एक कर पालक रोटी भिम (भ्यावाँ) क नाउम चह्राजाइट । भीके लाग एक कर रोटी पकाखे केल और ज खाइक लाग डुनु कर रोटी पर्कना चलन बा । अट्वारीम भीम जस्त बल्गर हुई पाउँ कैख थारु मनै व्रत बैठ्ना चलन बा । यहि मान्यताह विश्वास कर्टी थारु समुदाय भीम जसिन बल्या होए पाउँ कैख ‘अट्वारी’ पर्व मनाउन सुरु कर्लक थारु संस्कृतिविद अशोक थारु बटोइठ ।
थारु रज्वा दंगीशरणके राज्यम शत्रु आक्रमण कर ब्याला भीमके सहयोगम अट्वारक डिन विजय प्राप्त करल मान्यता अनसार थारु समुदाय भीमके नाउम अट्वारके डिन ‘अट्वारी’ पर्व मनाए सुरु करल संस्कृतिविद थारु बटोइठ । अट्वारी के डिन रोटी पकाख सेक्लसे घरक सकु व्रतालु थारु मनै फेर से लहाख एक ठाउँम बैस्ठ । आजरपाजर व्रतालु बैस्ठ ओ बीचम अग्यारी व लोट्यक पानी धर्ठ । डोस काइल पट्यक टप्रीम रोटी, अम्रुट, खिरा, क्यारा, ओ खोरेम दही, घ्यू निहुइलसे च्वाखा ट्याल धर्ठ ।
ब्रतालुहुक्र आ—आपन टप्रीमसे सक्कु खैना पहिल आपन डिडी बहिन्या हुकनके लाग अल्गैठ । जेहिन अग्रासन कैजाइट । अहिल डिडीबहिन्या हुनके लाग अग्रासन अल्गाइल पाछ व्रतालुहुक्र एककर पकाइल रोटी, व आघ रहल खैना चिज अग्नी डिउटाह चह्रैठ । रोटी ओ पलाहार अग्नीह चह्राख जल फे चह्रैलसे अप्न खाए सुरु कर्ठ । व्रतालुहुक्र खाके सेक्लसे घरके सक्कु जन्नी छाई मनै फे अट्वारीले रोटी फलफुल खैठ ओ बचल पिठक रोटी पकैठ ।
अट्वारीके ड्वासर डिन
अट्वारीके ड्वासर डिन अर्थात सोमारके डिन, ‘फर्हार’ कर्ठ । फर्हार अट्वारीके अन्तिम पूजा होे । फर्हार निकरटसम व्रतालुहुक्र बिहानभर पानी समेट निखाक बैस्ठ । ड्वासर डिन फे व्रतालु थारुमनै बिहान्नी लाहाखोर कैख भाट टिना रिझाए सुरु कर्ठ । ड्वासर डिन खाइक लाग तीन, पाँच वा सात प्रकारके टिना रिझैठ । जहाँ गब्दा, गुडा, पवइक साग भिन्डी, बोरी, मच्छी लगायतक टिना अनिबार्य जसिन रहट । भाट टिना रिझलपाछ सक्कु ब्रतालुहुक्र लहाख ग्वाबरले निपल च्वाखा ठाउँमा पाटा लाग्ख बैस्ठ ।
डोस सन्झ्यक जस्ट आ–आपन डिडीवहिन्या हुकनके लाग टप्री डोन्याम खैनाचिज पहिल छुट्यइठ । डोस भाट व सक्कु टिना सान्ख अग्यारीम चह्रैठ व जल चह्राख अप्न खैठ । खानपिन कैख सेक्लसे अट्वारीक पहिल डिन सन्झ्याख कहारल खैना चिज ओ ड्वासर डिन बिहान कहारल भाट टिना ‘अग्रासन’ परघर लागल आपन डिडीबहिन्याँ हुकन डेह जइना चलन बा । अग्रासन डेह धेर जसिन डाडुभैयाँ जैना चलन बा । तर डाडुभैयाँ निगैलसे घरक और सदस्यहुक्र फे अग्रासन डेह जइठ । अग्रासनके बट्या हेर्टी बैठल बेट्याओ आपन लहेरसे अग्रासन डेह अइलसे मानसम्मान कैख खवइठ ।
सम्मानार्थम जाँड, रक्सी व सिकार खवइना कर्ठ । अतिथि सत्कारक लाग थारु समुदायम जाँड रक्सी बरा मान्जिना हुईलओर्से लहेरसे अग्रासन डेह आई डाडुभैयाँ हुकन जाँड रक्सी खवाए पैलसे बेट्याओ सन्तुष्ट हुइलक महसुस कर्ठ । अट्वारी पर्वह डाडुभैयाँ व डिडीबहिन्या हुकनके सम्बन्ध सुदृढ कर्ना प्रेमके प्रतीक व भातृत्वप्रेमसँग सद्भाव पर्वके रुपम फे लेजाइट ।
लम्मा समयसम कर्म घरसे लहेर जाए निपाइल बेट्याओ अट्वारी पर्वम आपन डाडुभैयाँ व परिवारकेसंग भ्याट हुइलसे दुःखसुखकबाट कर्टी रमैठ । परापूर्व कालसे जो अग्रासन डेना कैगिल ओर्से परघर लागल बेट्याओ लहेर घरसे अइना अग्रासनके बट्या हेर्टी बैठल रठ ।