कोरोना भाईरस हामीलाई मार्न आएको होइन
सुप्रिया मा
यो संसारमा रहेका सबै प्राणीहरु चाहे त्यो जीवाणु (bacteria), किटाणु (germ), वा विषाणु (virus) नै किन नहोस उनिहरुमा जीवेषणा रहेको हुन्छ । अर्थात बाँच्ने प्रवल चाहना रहेको कारणले जसरी पनि बाँच्न चाहन्छन् । जीवेषणा भएको करणले गर्दा जस्तोसुकै परिस्थिति अथवा कुनै पनि अवस्थामा वा जस्तोसुकै संघर्ष गरेर भएपनि आफ्नो अस्तित्व बचाई राख्न चाहन्छन् । प्रकृतिलेनै प्राणीहरुलाई त्यस्तै बनाएको छ । जस्तोसुकै परिस्थितिमा पनि आफ्नो जीवन बचाई राख्न प्राणीहरु जीवनभर संघर्ष गरिरहन्छ ।
बाँच्नका लागि बस्ने घर वा भनौ बासस्थानको पनि आवस्यक्ता पर्दछ । जीवेषणा भएको कारणले बासस्थान नहुने स्थिति हुने बित्तिकै प्राणीले तुरुन्तै अर्को बासस्थानको खोजी गर्दछ ।
जीवाणु, किटाणु र विषाणुहरु पनि आफ्नो बासस्थानमा आरामले बसेका हुन्छन र अफ्नो अस्तित्व बचाई राखेका हुन्छन् । मानव शरिरलाई पनि आफ्नो बासस्थान बनाएर लाखौं, करोडौं यस्ता जीवाणु, किटाणु र विषाणुहरु मानव अस्तित्व रहेदेखि नै बसिरहेका छन् । मानिसहरु पनि उनीहरुलाई लिएर आरामले बाचिरहेकै छन् ।
हामीले कोरोना भाइरस (Covid -19) नाम दिएको यो विषाणु वा भाइरस पनि कुनै जनावर वा किराहरुमा आफ्नो बासस्थान बनाएर उनीहरुलाई कुनै प्रकारको हानी नगरिकन बसिरहेको थियो र अहिले पनि बसिरहेको छ । जनावर र किराहरु पनि यो भाइरससंगै बाँचिरहेका थिए, बाँचिरहेका छन् । कोरोना भाइरससंगै बाच्न जानेका थिए, जानेका छन् र बाचिरहेकै छन् ।
अहिले आएर यो कोरोना भाइरस कुनै कारणवश मानिसको शरिरमा प्रवेश गर्न पुग्यो । हाम्रा लागि त्यो नयाँ पाहुना भयो र उस्का लागि मानव शरिर एउटा नयाँ घर भयो । नचिनेको नयाँ पाहुनाले हामीलाई त्रसित बनायो । जीवेषणा भएको कारणले त्यो भाइरस जस्तोसुकै परिस्थितिमा पनि बाच्न चाहन्छ । हाम्रो शरिरभित्र त्यो भाइरसलाई बाँच्नका लागि धेरै संघर्ष गर्नुपर्ने हुन्छ र आफु बाँच्न सक्ने मानिस भित्रको कोशिका खोजेर त्यहाँ गएर बस्दछ । भाइरसले आफु बाँच्नका लागि संघर्ष गर्दा मानिसहरुलाई हानी हुन जान्छ । जुन मानिसको प्रतिरोध शक्ति (Immunity Power) कम हुन्छ, त्यस्ता मानिसहरुले भाइरसको संघर्षलाई सहन गर्न सक्दैनन् र आफ्नो जीवन गुमाउनु पर्ने पनि हुन्छ । मानिसहरुले पनि आफ्नो जीवेषणाका कारणले बाँच्नका लागि संघर्ष गर्दछन् र भाइरसले पनि बाँच्नकै लागि संघर्ष गरिरहन्छ । यो संघर्षमा कहिले मानिसहरु मर्नु पर्ने हुन्छ त कहिले भाइरसहरु । धेरैेजसो मानिसहरु, जस्को प्रतिरोध शक्ति (Immunity Power) बलियो छ, उनीहरु बाँचिरहेका छन् । धेरै मानिसहरुलाई यो भाइरसले पनि कुनै प्रकारको हानी गरेको छैन् । यसरि बासस्थान खोज्दै हाम्रो शरिरमा झुक्किएर प्रवेश गरेको भाइरसले संघर्ष गरिरहेको छ र कहिलेसम्म हाम्रो शरिरमा संघर्ष गरिरहन्छ, त्यो पनि थाहा छैन । यो भाइरस पनि मानिसलाई मार्न आएको होइन, आफु बाँच्नका लागि घर खोज्दै आएको हो । नयाँ घरमा आफु बाँच्नका लागी प्रवेश गरेर संघर्ष गरिरहेको छ । यो नयाँ भाइरसको प्रवेशले मानिसहरुलाई दुःख, त्रास र कष्ट भयो त्यो अर्काे कुरा हो ।
आशागरौं, केही समयपछि हाम्रो शरिरबाट यो आफै निस्केर जाओस् । अथवा यस्तो पनि हुन सक्छ, भाइरस फैलिएको केही समय बितेपछि भाइरसले पनि आफुलाई परिवर्तन गरेर मनिसहरुलाई कुनै हानी नगरिकन मानव शरिर भित्र जीउन सक्ने भएर आउला । मानिसहरु पनि आफुलाई बलियो बनाएर यो भाइरसलाई संगै लिएर बाँच्न सक्ने बन्लान् । कामना गरौं त्यस्तो दिन आओस्, जुनदिन मानिस र भाइरस दुबै आरामले बाँच्न सकुन् ।
-सुप्रिया मां आनन्दपथ सस्थाका सस्थापक हुनुहुन्छ ।
